کرشنا شرما دامنی کی شاعری زندگی کے ہر رنگ کی عکاسی کرتی ہے:پروفیسر شیخ عقیل احمد

نئی دہلی، 14 جون (یو این آئی) کرشنا شرما دامنی ہندی کی ٹیچر، رائٹر اور شاعرہ ہیں مگر اس کے ساتھ ہی اردو سے ان کا والہانہ تعلق ہے اور انھوں نے قومی اردو کونسل کے سینٹر سے اردو ڈپلوما کرکے اردو سیکھی اور اب اس زبان میں انھوں نے اتنی مہارت حاصل کرلی ہے کہ وہ اس میں بہترین شاعری بھی کرتی ہیں۔یہ بات قومی کونسل برائے فروغ اردو زبان کے ڈائریکٹر پروفیسر شیخ عقیل احمد نے دامنی کے شعری مجموعے ’شدت عشق‘ کا اجرا کرتے ہوئے کہی۔

انہوں نے کہاکہ دامنی صاحبہ کی شاعری میں حسن و عشق اور زندگی کے تمام رنگ پائے جاتے ہیں۔ اردو اور ہندی شاعری میں تخاطب کا جو فرق ہے اس کو انھوں نے بہت اچھے انداز میں برتا ہے۔انہوں نے کہا کہ اپنی شاعری میں انھوں نے اردو کے ساتھ ہندی شاعری کی علامات و استعارات کا بھی بھرپور استعمال کیا ہے اور اس طرح ہندی



اور اردو کو قریب لانے کی بہت عمدہ کوشش کی ہے۔

اتراکھنڈ اردو اکادمی کے سابق صدر افضل منگلوری نے کہا کہ کرشنا شرما دامنی اپنی شاعری اور شخصیت کے ذریعے سماجی اتحاد کا پیغام دیتی ہیں جو ان کا امتیاز ہے۔ اردو ہندی ایکتا ٹرسٹ کے پلیٹ فارم سے اردو اور ہندی کو ساتھ لاکر مشترکہ تہذیب و ثقافت کی نمائندگی کی ان کی کاوش بھی قابل قدر ہے۔پروفیسر شہپر رسول نے شاعرہ کو مبارکباد پیش کرتے ہوئے کہا کہ ان کی تخلیق غیر معمولی ریاضت، تخلیقی جدوجہد اور عمدہ فن کاری کا نمونہ ہے۔ اردو ہندی ایکتا ٹرسٹ کی حصولیابیوں پر بھی مبارکاد پیش کی کہ اس سے دونوں زبان والوں میں بھی اتحاد و اشتراک پیدا ہوگا۔ انھوں نے کہا کہ ان کی شاعری زبانِ اردو سے ان کے عشق کی شدت کی نمائندہ ہے اور اس میں سادگی کے ساتھ حسن بھی پایاجاتا ہے۔ یہ ان کی شاعری کا نمایاں وصف ہے۔