حیدرآباد: وزیر سریدھر بابو کے ہاتھوں وینگارڈ گلوبل ویلیو سینٹر کا افتتاح

حیدرآباد: تلنگانہ کے آئی ٹی اور انڈسٹریز کے وزیر ڈی سری دھر بابو نے پیر کے دن دنیا کی مشہور سرمایہ کاری کمپنی وینگارڈ (Vanguard)کے گلوبل ویلیو سینٹر کا افتتاح کیا۔ یہ مرکز حیدرآباد میں قائم کیا گیا ہے، جہاں انجینئرنگ، کلاؤڈ، ڈیٹا، مصنوعی ذہانت، مشین لرننگ اور سائبر سیکیورٹی کے شعبوں میں کام کیا جائے گا۔ اس موقع پر وزیر نے کہا کہ وینگارڈ کا حیدرآباد آنا ریاست کے لیے ایک بڑی کامیابی ہے۔ انہوں نے کہا کہ تلنگانہ حکومت عالمی کمپنیوں کے ساتھ شراکت داری اور نئی ٹیکنالوجی کو فروغ دینے کے لیے پرعزم ہے۔ وینگارڈ دنیا کی سب سے بڑی سرمایہ کاری کمپنی ہے، جس



کے پاس 12.5 ٹریلین امریکی ڈالر کے اثاثے ہیں۔ اب یہ کمپنی بھی ان بین الاقوامی اداروں میں شامل ہوگئی ہے جنہوں نے حیدرآباد کو اپنا نیا مرکز بنایا ہے۔  سری دھر بابو نے بتایا کہ گزشتہ سال ریاست میں 70 نئی عالمی کمپنیوں نے اپنے دفاتر قائم کیے اور اگلے سال یہ تعداد 120 تک پہنچنے کی امید ہے، جس سے 1.2 لاکھ نئی نوکریاں پیدا ہوں گی۔ انہوں نے کہا کہ جلد ہی "گلوبل انوویشن ہب" شروع کیا جائے گا تاکہ نئی ٹیکنالوجی، ریسرچ اور اختراع کو فروغ دیا جا سکے۔ وینگارڈ کے گلوبل چیف انفارمیشن آفیسر نِتِن ٹنڈن نے کہا کہ ہم حیدرآباد میں اپنا نیا ٹیکنالوجی سینٹر کھولنے پر بہت خوش ہیں، یہ مرکز ہماری جدت اور ترقی کے مشن کو آگے بڑھائے گا۔