رواں سال دو خواتین سائنسدانوں کو کیمسٹری کا نوبل انعام

اسٹاک ہوم، 07 اکتوبر (یواین آئی) کیمسٹری کے لئے اس سال کا نوبل انعام دو خواتین سائنس دانوں ایمانوئل کارپینٹی اور جینیفر اے ڈوڈنا کو مشترکہ طور پر 'جینوم ایڈیٹنگ' کے لئے دیا جائے گا۔

رائل سویڈش اکیڈمی آف سائنسز نے بدھ کے روز ایک بیان جاری کرکے کہا کہ ان دونوں سائنسدانوں نے جینیاتی ٹکنالوجی کا ایک اہم آلہ سی آر آئی ایس پی آر۔سی اے ایس9 تیار کیا ہے۔

کیمسٹری کے نوبل کمیٹی کے چیئرمین سی گسٹافسن نے کہا کہ دونوں سائنسدانوں نے جینیٹک سیزر کی اہم دریافت کی ہے۔ اس کے ذریعے جانوروں ، پودوں ، مائیکروآرگنزم کے ڈی این اے کو تبدیل کرنے سے سنگین



بیماریوں کا علاج ممکن ہوگا۔

مسٹر گسٹافسن نے کہا کہ "اس سے جانوروں ، پودوں اور جرثوموں کے ڈی این اے میں تبدیلی کئے جاسکیں گے۔اس سے کینسر سمیت متعدد سنگین اور جینیاتی بیماریوں کا علاج ہوسکے گا۔‘‘

محترمہ کارپینٹی اور محترمہ ڈوڈنا کیمسٹری کے نوبل انعام حاصل کرنے والی پانچویں اور چھٹی خواتین سائنسدان ہیں۔ 1901 سے 2019 تک مجموعی طور سے 112 سائنس دانوں کو کیمسٹری کا نوبل انعام دیا گیا ہے۔

محترمہ کارپینٹی برلن میں واقع میکس پلانک یونٹ فار سائنس آف پیتھوجینس کی ڈائریکٹر ہیں اور محترمہ ڈوڈنا یونیورسٹی آف کیلیفورنیا میں خدمات انجام دے رہی ہیں۔