سونیا گاندھی نے کانگریس کے یوم تاسیس پر پرچم کشائی کی

نئی دہلی، 28 دسمبر(یو این آئی)کانگریس صدر سونیا گاندھی نے پارٹی کے 135ویں یوم تاسیس پر آج یہاں پارٹی ہیڈکوارٹر پر ترنگالہرایااور پورے ملک میں چلنے والے پارٹی کے ’’آئین بچاؤ۔بھارت بچاؤ‘ مہم کی ابتداکی۔

کانگریس ہیڈکوارٹر میں منعقد پروگرام میں پارٹی کےسابق صدر راہل گاندھی، سابق وزیراعظم منموہن سنگھ، سینئر لیڈر اے کے انٹونی اور موتی لال وہرہ سمیت دیگر اہم لیڈروں نے شرکت کی تھی۔ محترمہ گاندھی نے وندے ماترم اور راشٹرگان کے درمیان پرچم کشائی کی اور کارکنوں میں مٹھائی تقسیم کی۔

پارٹی لیڈروں نے اس موقع پر ملک کے سبھی ریاستوں کی راجدھانیوں میں پرچم کشائی کی اور ’’آئین بچاؤ۔ ہندوستان بچاؤ‘ مہم کی شروعات کی۔

مسٹر راہل



گاندھی نے اس موقع پر آسام میں کئی پروگراموں میں حصہ لیا اور جلسہ عام سے خطاب کیا۔ آسام میں سب سےپہلے لوگ شہریت ترمیمی قانون اور قومی شہریت رجسٹر کے خلاف سڑکوں پر اترے اور پھر یہ مظاہرہ پورے ملک میں پھیل گیا۔ مظاہرے کے دوران کئی جگہوں پر پرتشدد واقعات ہوئے جس میں کئی لوگ مارے گئے اور بڑے پیمانے پر پبلک پراپرٹی کو نقصان پہنچایا گیا۔

کانگریس جنرل سکریٹری پرینکا وڈرا گاندھی نے لکھنؤ میں اس موقع پر منعقد پروگرام میں حصہ لیا۔اس دوران انہوںنے آئین کا پریمبل پڑھا، جسے وہاں موجود کارکنوں نے دہرایا، اس کے ساتھ ہی ملک کےمختلف ریاستوں میں یہ پروگرام منعقد کیا گیا اور جھنڈا مارچ نکالا گیا۔ کارکنوں نے متعلقہ ریاست کی زبان میں آئین کا پریمبل پڑھا۔