نئی دہلی،2جنوری (یو این آئی) قومی شہریت ترمیمی بل، این آر سی، این آر پی اور دفعہ 370کے خاتمے کو ملک کو توڑنے والا قانون قرار دیتے ہوئے سوشل ڈیموکریٹک پارٹی آف انڈیا (ایس ڈی پی آئی) سکریٹری ڈاکٹر تسلیم رحمانی نے کہاکہ اس حکومت نے دوسری میعاد کے چھ سات ماہ کے دوران 60 فیصد ایسے قوانین پاس کرائے ہیں جو ملک کو توڑنے والے ہیں۔
یہ بات
آج یہاں انہوں نے تنظیم علمائے حق کے زیر اہتمام عالمی کنونشن سے خطاب کرتے ہوئے کہی۔
انہوں نے کہاکہ خواہ تین طلاق قانون کا معاملہ ہو، کشمیر سے دفعہ 370ختم کئے جانے کایا موجودہ شہریت ترمیمی قانون پاس کرانے کا، یہ سماج میں تفریق پیدا کرنے والے اور ملک کو توڑنے والے ہیں لیکن موجودہ شہریت ترمیمی قانون اس حکومت کے لئے الٹا پڑگیا ہے۔