قرض میں مبتلا کسان خودکشی کررہے ہیں، حکومت کو فکرنہیں: پرینکا

نئی دہلی، 4فروری (یو این آئی) کانگریس کی جنرل سکریٹری پرینکا گاندھی واڈرا نے قرض کی وجہ سے کسانوں کی خودکشی پر مودی حکومت کو نشانہ بناتے ہوئے منگل کوکہا کہ اس کے دعووں کی پول کھولنے والے ان واقعات پر توجہ نہیں دی جارہی ہے۔

محترمہ واڈرا نے ٹوئٹ کیا کہ جب بھارتیہ جنتا پارٹی حکومت بجٹ میں کسانوں کے مفادات کی کھوکھلی باتیں کررہی تھی اسی وقت اترپردیش کے باندا میں کسان کی



خودکشی کا واقعہ حکومت کے دعووں کی پول کھول رہا تھا۔ بندیل کھنڈ میں قرض کے سبب کسان کے خودکشی کے واقعات رکنے کا نام نہیں لے رہے ہیں لیکن بی جے پی نے اس کی کوئی فکر نہیں کی۔

اس کے ساتھ ہی انہوں نے ایک خبر بھی پوسٹ کی ہے جس میں لکھا ہے کہ بینک اور ساہوکاروں کے قرض سے پریشان کسان نے خودکشی کی۔ خبر میں یہ بھی کہا گیا ہے کہ کسان نے پیسہ نہیں ہونے کی وجہ سے بچوں کو اسکول بھیجنا بھی بند کردیا تھا۔