کینیڈا میں بیف باربی کیو پر تنازع، بھارتی مکان مالکن گرفتار

کینیڈا میں بیف کا باربی کیو کرنے پر مکان مالکن اور کرایہ دار کے درمیان تنازع شدت اختیار کرگیا، جس کے بعد بھارتی نژاد مکان مالکن راج تیوانا کو گرفتار کرلیا گیا۔ واقعے کی متعدد ویڈیوز سوشل میڈیا پر وائرل ہوگئیں۔

بتایا گیا ہے کہ تنازع اس وقت شروع ہوا جب راج تیوانا نے کرایہ دار کو باغ میں دوست کے ساتھ بیف باربی کیو کرنے سے روکا اور جائیداد کو نقصان پہنچنے کا خدشہ ظاہر کیا۔ ایک ویڈیو میں انہیں گرل سے گوشت ہٹاتے ہوئے دیکھا گیا، جبکہ کرایہ دار نے الزام لگایا کہ وہ اسے دھمکا رہی ہیں۔

بعد میں کرایہ دار نے



’Tiwana Farm Survivor‘ انسٹاگرام اکاؤنٹ پر کئی ویڈیوز شیئر کرتے ہوئے مکان مالکن پر مسلسل ہراسانی، بغیر اجازت گھر میں داخل ہونے اور تالے تبدیل کرنے کے الزامات عائد کیے۔ اس نے یہ بھی دعویٰ کیا کہ اس کے یونٹ کا دروازہ مکمل طور پر ہٹا دیا گیا اور یہ تیسری بار تھا کہ اس کی رہائش میں توڑ پھوڑ کرکے داخل ہونے کی کوشش کی گئی۔

کرایہ دار کے مطابق اس نے 15 اگست تک کا کرایہ ادا کر رکھا تھا اور وہ اپنی رہائش اور سامان کی حفاظت سے متعلق خدشات کی وجہ سے تمام واقعات ریکارڈ کررہا ہے۔ تاہم، سوشل میڈیا پر موجود ویڈیوز اور الزامات سے پورے معاملے کی تمام تفصیلات آزادانہ طور پر ثابت نہیں ہوتیں۔