دوردرشن پیشہ ور افراد کی تقرری کرےگا

نئی دہلی،16ستمبر(ایجنسی) وزیر اطلاعات و نشریات پرکاش جاؤڈیکر نے ٹیلی ویژن کو عوام کی زندگی کا اہم حصہ بناتے ہوئے دوردرشن کے معیار میں بہتری لانے کا مشورہ دیا ہے۔

مسٹر جاؤڈیکر نے پیر کو یہاں دور درشن کے 60 سال مکمل ہونے کے موقع پر منعقد تقریب سے خطاب کرتے ہوئے یہ خیال ظاہر کیا۔ اس موقع پر انہوں نے دور درشن پر ایک ڈاک ٹکٹ بھی جاری کیا اور دور درشن انعامات بھی تقسیم کیے۔

مسٹر جاؤڈیکر نے کہا کہ ٹیلی ویژن تمام عمرکے عوام کے لیے ایک مضبوط ذریعہ بن گیا ہے چاہے وہ بچے ہوں یا بوڑھے سبھی کی زندگی کا



اہم حصہ بن گیا ہے۔ انہوں نے کہا کہ لیکن دور درشن کے معیار میں بہتری لانا ہے اس لیے دور درشن کے 32 لوکل چینلوں کے نئے تخلیق کار سربراہ مقرر کرنے کا فیصلہ کیا ہے۔ انہوں نے کہا کہ دور درشن کو محض افسر ہی نہیں چلا سکتے۔ اسے آرٹسٹ اور پیشہ ور افراد چلائیں۔

مرکزی وزیر نے کہا کہ اس لیے تخلیق کار افراد کو مقرر کیے جانے کا فیصلہ کیا گیا ہے۔ اس موقع پر وزارت کے سکریٹری امت کھرے اور پرسار بھارتی کےکارگزار سربراہ ششی شیکھر، صدر اے سوریہ پرکاش اور دوردرشن کی ڈائریکٹر جنرل سپریا ساہو کے علاوہ دیگر افسران بھی موجود تھے۔