مودی نےممبئی میں تین میٹرو لائن کی بنیاد رکھی

ممبئی، 7 ستمبر (ایجنسی)وزیراعظم نریندر مودی نے سنیچر کو یہاں تین میٹرو لائنوں کی بنیاد رکھی۔

مسٹر مودی نے میٹرو لائن کی بنیاد رکھنے سے پہلے مغربی مضافاتی ورلے پارلے میں واقع لوک مانیہ سیوا سنگھ کے تلک مندر میں بھگوان گن پتی کی پوجا کی۔

وزیراعظم مودی نے گنپتی کی پوجا کے بعد ’ میک ان انڈیا ‘کے تحت بنائے گئے پہلے میٹرو کوچ کا بھی افتتاح کیا۔

وزیراعظم نے میٹرو لائن کی بنیاد رکھتے ہوئے ملک کے سائنسدانوں کی تعریف کی اور کہا ہے کہ وہ سائنسدانوں کے دکھائے گئے ہمت اور عزم سے متاثر ہیں۔ انہوں نے کہا کہ ’’یہ میں نے ان سے سیکھا ہے کہ بڑے چیلنج کے باوجود ہدف کو



کیسے حاصل کیا جاتا ہے۔ وہ تب تک کوشش کرنا بند نہیں کریں گے جب تک وہ ہدف کو نہیں حاصل کرلیتے۔‘‘

مسٹر مودی نے نے کہا کہ لوک مانیہ گنگادھر تلک نے سماج کو بااختیار بنانے کے لئے جس گنیش اتسو کی ابتدا کی تھی اس کی گونج آج ملک میں بھی سنی جاسکتی ہے۔ اس سال لوک مانیہ سیوا سنگھ کے گنیش اتسو کی صد سالہ بھی ہے اور پوری امید ہے کہ گنیش اتسو کی صدی پلاسٹک سے آزاد کرنے میں اہم کردار ادا کرے گی۔

انہوں نے کہا کہ بپا کی وداعی کے دوران بہت سارا پلاسٹک اور کچرا سمندر میں چلا جاتا ہے، اس مرتبہ ہمیں کوشش کرنی ہے کہ ایسے سامان جو پانی کی آلودگی میں اضافہ کرتا ہے اس کو پانی میں نہیں بہائیں گے۔