اعتماد نیوز 25 نومبر 2025 (ذرائع) تلنگانہ کے ویمل واڈہ کے رکنِ اسمبلی اور سرکاری وِہپ آدی سرینواس اور سرسلہ انچارج کلکٹر گریمہ اگروال زیرِ تعمیر ڈبل بیڈ روم مکانات کے معائنے کے دوران ایک ممکنہ بڑے حادثے سے محفوظ رہے۔موصولہ اطلاعات کے مطابق، ویمل واڈہ میونسپل حدود میں جاری تعمیراتی کاموں کا جائزہ لیتے وقت آدی سرینواس اور کلکٹر گریمہ اگروال کے
ساتھ متعلقہ محکموں کے اعلیٰ افسران اور مقامی قائدین بھی موجود تھے۔معائنے کے دوران، جب وفد زیرِ تعمیر بیسمنٹ کے فرش پر کھڑا تھا، تو اچانک فرش کا ایک حصہ دھنس گیا، جس کے باعث چند لمحوں کے لیے خوف و ہراس پیدا ہوگیا۔ موقع پر موجود عملے اور قائدین نے فوری چوکسی کا مظاہرہ کرتے ہوئے وِپ آدی سرینواس اور کلکٹر گریمہ اگروال کو محفوظ مقام پر منتقل کیا، جس سے ایک بڑا حادثہ ٹل گیا۔