سنکرانتی سیزن میں تلنگانہ آر ٹی سی کی آمدنی میں نمایاں اضافہ

تلنگانہ 18 جنوری 2026 (اعتماد نیوز) سنکرانتی کے  سیزن میں تلنگانہ اسٹیٹ روڈ ٹرانسپورٹ کارپوریشن کو بھاری آمدنی ہوئی ہے اس سال ڈبل ویک اینڈ آنے کے باعث بڑی تعداد میں ملازمین شہر چھوڑ کر اپنے آبائی علاقوں کی جانب روانہ ہوئے۔ سنکرانتی تعطیلات کے دوران مسافروں کے بڑھتے رش کو پیشِ نظر رکھتے ہوئے آر ٹی سی کی جانب سے کیے گئے پیشگی انتظامات کامیاب رہے۔حکام کے مطابق 9 جنوری سے 13 جنوری تک محض



پانچ دنوں میں ٹکٹ چارجز کے ذریعے ادارے کو 67.40 کروڑ روپے کی آمدنی حاصل ہوئی۔ اس طرح اوسطاً یومیہ 13.48 کروڑ روپے کی کمائی ریکارڈ کی گئی، جو قابلِ ذکر ہے۔عام دنوں کے مقابلے میں آمدنی میں اس نمایاں اضافے کی بڑی وجہ آر ٹی سی کی جانب سے چلائی گئی خصوصی بس سروسز رہیں۔ مسافروں کے رش کے مطابق مجموعی طور پر 6,431 خصوصی بسیں سڑکوں پر اتاری گئیں۔ ان خصوصی بسوں کے ذریعے روزانہ اوسطاً 2.70 کروڑ روپے اضافی آمدنی حاصل ہوئی۔