تلنگانہ: جگتیال میں سیاسی ہلچل: ٹی جیون ریڈی کا کانگریس سے استعفیٰ

تلنگانہ: جگتیال میں آج اس وقت بڑا سیاسی ہلچل مچ گئی جب سینئر کانگریس لیڈر ٹی جیون ریڈی نے پارٹی سے استعفیٰ دینے کا اعلان کر دیا۔ چار دہائیوں پرانی وابستگی ختم کرتے ہوئے انہوں نے کہا کہ اب مزید ذلت اور ذہنی دباؤ برداشت کرنا ممکن نہیں۔ استعفیٰ کے بعد جذباتی مناظر دیکھنے کو ملے۔ اندرا بھون سے جمبی ہنومان مندر تک ریلی نکالی گئی جہاں جیون ریڈی نے پوجا کی۔ اس دوران کارکنان نے زوردار نعرے لگائے اور کئی افراد آبدیدہ ہو گئے۔ بنڈاری گارڈن میں منعقدہ پارٹی کارکنوں کے اجلاس سے خطاب کرتے ہوئے جیون ریڈی نے کہا کہ پارٹی قیادت پر سخت الزامات عائد کرتے ہوئے کارکنوں کے حقوق کو نظر انداز کیا جا رہا ہے اور باہر سے آنے والے رہنماؤں کو ترجیح



دی جا رہی ہے۔ انہوں نے وزیر اعلیٰ ریونت ریڈی کو بھی تنقید کا نشانہ بناتے ہوئے کہا کہ کارکنوں کو نظر انداز کیا جا رہا ہے۔ انہوں نے اپنے سیاسی سفر کا ذکر کرتے ہوئے کہا کہ وہ 1984 میں کانگریس میں شامل ہوئے اور ہمیشہ پارٹی کے لیے کام کیا، لیکن اب حالات ایسے ہو گئے ہیں کہ پارٹی چھوڑنا پڑ رہا ہے۔ جیون ریڈی کے استعفیٰ کے بعد بڑی تعداد میں کارکنوں اور مقامی رہنماؤں نے بھی پارٹی سے استعفیٰ دے دیا اور ان کے ساتھ رہنے کا اعلان کیا۔ جیون ریڈی نے واضح کیا کہ وہ اب بھی عوام کے حقوق کے لیے جدوجہد جاری رکھیں گے اور جلد ہی نئی سیاسی حکمت عملی کا اعلان کریں گے۔ جگتیال میں اس پیش رفت کے بعد سیاسی ماحول گرم ہو گیا ہے۔