تلنگانہ ہائی کورٹ کا ایس آئی آر فارم صرف تلگو میں تقسیم کرنے پر الیکشن کمیشن سے جواب طلب

ذرائع:

تلنگانہ ہائی کورٹ نے ریاست میں جاری ایس آئی آر عمل کے دوران مردم شماری فارم صرف تلگو زبان میں تقسیم کرنے پر الیکشن کمیشن سے وضاحت طلب کی ہے۔ کریم نگر سے تعلق رکھنے والے سماجی کارکن ایم اے مجیب ایوب کی درخواست پر سماعت کرتے ہوئے عدالت نے کہا کہ غیر تلگو بولنے والے ووٹروں، خصوصاً اقلیتی اور لسانی برادریوں کو



فارم سمجھنے میں دشواری پیش آ سکتی ہے۔الیکشن کمیشن نے عدالت کو بتایا کہ جی ایچ ایم سی کے باہر تلگو اور جی ایچ ایم سی میں انگریزی فارم تقسیم کئے جا رہے ہیں، جبکہ انگریزی اور اردو فارم آن لائن بھی دستیاب ہیں۔ تاہم عدالت نے اس پالیسی پر سوال اٹھاتے ہوئے اقلیتی برادریوں کے مفادات کے تحفظ سے متعلق وضاحت طلب کی۔ معاملے کی مزید سماعت پیر کو ہوگی۔