وزیرِ اعلیٰ ریونت ریڈی کا سخت انتباہ،گندی سڑکوں پر فوری معطلی

ذرائع:

حیدرآباد: تلنگانہ کے وزیرِ اعلیٰ ریونت ریڈی نے بلدی نظم و نسق کے اعلیٰ سطحی جائزہ اجلاس میں سخت لہجہ اختیار کرتے ہوئے واضح کیا کہ شہر میں صفائی کے معاملے میں کسی قسم کی لاپرواہی برداشت نہیں کی جائے گی۔ انہوں نے خبردار کیا کہ اگر کہیں سڑکیں گندی پائی گئیں تو ذمہ دار افسران کو موقع پر ہی معطل کر دیا جائے گا۔ وزیرِ اعلیٰ نے کہا کہ شہریوں کو صاف ستھرا ماحول فراہم کرنا حکومت کی اولین ترجیح ہے۔ اجلاس میں فیصلہ کیا گیا کہ جی ایچ ایم سی کو تین کارپوریشنوں میں تقسیم کرنے کی



تیاریوں کے ساتھ انتظامی نظام کو مزید مؤثر بنایا جائے گا۔انہوں نے ہدایت دی کہ شہر بھر میں یکساں اسٹریٹ لائٹنگ کو یقینی بنایا جائے تاکہ ہر علاقہ روشن اور محفوظ رہے۔ ساتھ ہی صفائی کے نظام کو سختی سے نافذ کیا جائے اور متعلقہ افسران و عملہ کے لیے روزانہ فیلڈ وزٹ لازمی قرار دیے جائیں۔ وزیرِ اعلیٰ نے زور دے کر کہا کہ عوامی مسائل کے حل میں کسی قسم کی کوتاہی برداشت نہیں کی جائے گی اور کارکردگی کی بنیاد پر ہی افسران کی ذمہ داری طے کی جائے گی۔ حکومت کا مقصد حیدرآباد کو صاف، روشن اور منظم شہر بنانا ہے۔