کورونا وائرس سے ہونے والی اموات کے لئے ذمہ دار کون ہے: پرینکا گاندھی

نئی دہلی، 25 مئی (یو این آئي) کانگریس کی جنرل سکریٹری پریانکا گاندھی نے کہا ہے کہ کورونا وائرس کی دوسری لہر کے دوران بڑی تعداد میں لوگوں نے اپنے کنبے کے افراد کو کھویا ہے، اس لئے حکومت کو بتانا چاہئے کہ یہ کس کی لاپرواہی کی وجہ سے ہوا اور اس کے لئے کون ذمہ دار ہے محترمہ پرینکا گاندھی نے منگل کے روز فیس بک پرا یک پوسٹ میں کہا کہ جب ملک میں کورونا وائرس کی دوسری لہر نے قہر برپا کرنا شروع کیا اور لوگ اسپتال میں بستر، آکسیجن، ویکسین اور دواؤں کے لئے جدوجہد کر رہے تھے، تو لوگوں کو یہ توقع تھی کہ حکومت اس صورتحال سے نمٹنے کے لئے



دستیاب وسائل کا بھرپور استعمال کرکے لوگوں کو بچانے کا کام کرے گی، مگر مرکزی حکومت پوری طرح خاموش تماشائی بنی رہی اور پورے ملک میں تکلیف دہ صورتحال پیدا ہوگئی۔

انہوں نے کہا کہ تیاری کے نام پر حکومت کے پاس کچھ نہیں تھا۔ اس لئے فوری طور پر حکومت نے اپنی غیر ذمہ داری کا مظاہرہ کیا اور ویکسین برآمد کرنے کی اجازت دے دی اور 2020 میں اس کی برآمدات کو دوگنا کردیا۔ ملک کی آبادی سے قطع نظر، حکومت کا طرز عمل مکمل طور پر غیر ذمہ دار رہا۔ حکومت کی اس لاپرواہی کی وجہ سے، دوسری لہر کے دوران بے شمار اموات سے پتہ چلتا ہے کہ یہ قہر کس قدر تباہ کن تھا۔