سنبھل کے رکن پارلیمنٹ شفیق الرحمن برق کاانتقال،94سال کی عمر میں آخری سانس لی

ذرائع:

سنبھل:سنبھل سے سماج وادی پارٹی کے رکن پارلیمنٹ شفیق الرحمن برق کا منگل کو 94 سال کی عمر میں انتقال ہوگیا۔ انہوں نے مرادآباد کے سدھا اسپتال میں آخری سانس لی۔واضح رہےکہ ان کی طبیعت کچھ عرصے سے بگڑ رہی تھی۔ جسمانی کمزوری اور دست کی وجہ سے انہیں اسپتال میں داخل کرایا گیا تھا۔ ڈاکٹروں نے بتایا کہ وہ گردے کے انفیکشن میں مبتلا ہیں۔

شفیق الرحمان 11 جولائی 1930 کو پیدا ہوئے۔ انہوں نے سیاست کا آغاز چودھری چرن سنگھ کے دور سے کیا۔ وہ بابری مسجد ایکشن کمیٹی کے کنوینر بھی تھے۔ وہ مسلمانوں کی آواز بلند کرنے اور ایماندارانہ شبیہ رکھنے کے لئے ملک بھر میں



جانے جاتے تھے۔ انہوں نے سماج وادی پارٹی کے قیام کے دوران ملائم سنگھ یادو کے ساتھ بھی کام کیا تھا اور انہیں ایس پی کا بانی رکن بھی کہا جاتا تھا۔

برق، جو اس وقت سنبھل سے سماج وادی پارٹی کے رکن پارلیمنٹ ہیں، 5 بار لوک سبھا انتخابات جیت چکے ہیں۔ انہوں نے سال 1996، 1998 اور 2004 میں ایس پی سے تین بار مراد آباد لوک سبھا سیٹ سے کامیابی حاصل کی تھی۔ اس کے بعد وہ سنبھل لوک سبھا سے 2009 میں بی ایس پی کے ٹکٹ پر جیتنے میں کامیاب ہوئے۔ اس کے بعد، 2019 میں، وہ دوبارہ ایس پی کے ٹکٹ پر سنبھل سے جیت گئے. تاہم، 1999 مرادآباد سیٹ اور 2014 کے لوک سبھا انتخابات میں، وہ سنبھل سیٹ سے صرف 5174 ووٹوں کے فرق سے ہار گئےتھے۔