تلنگانہ SIR-2026: چیف الیکٹورل آفیسر کی نوٹس، سماعتوں اور زیرِ التوا کیسز پر اہم ہدایات

حیدرآباد: تلنگانہ میں جاری اسپیشل انٹینسیو ریویژن، SIR-2026 کے سلسلے میں چیف الیکٹورل آفیسر تلنگانہ سی سدھارشن ریڈی، آئی اے ایس نے اہم ہدایات جاری کی ہیں۔ 7 ستمبر 2026 کو چیف الیکٹورل آفیسر سی سدھارشن ریڈی نے ایڈیشنل چیف الیکٹورل آفیسر ڈاکٹر واسم وینکٹیشور ریڈی اور ڈپٹی سی ای او جی ایس چاری کے ہمراہ جی ایچ ایم سی کمشنر و ڈسٹرکٹ الیکشن آفیسر حیدرآباد، تمام ڈسٹرکٹ الیکشن آفیسرز اور الیکٹورل رجسٹریشن آفیسرز کے ساتھ ویڈیو کانفرنس منعقد کی۔ اجلاس میں SIR-2026 کے تحت ووٹرس کو نوٹس کی فراہمی اور سماعتوں کے انعقاد سمیت زیرِ التوا معاملات کا جائزہ لیا گیا۔ چیف الیکٹورل آفیسر نے ہدایت دی کہ ہر نوٹس متعلقہ ووٹر کو بی ایل او خود شخصی طور پر پہنچائے۔ خاص طور پر شہری علاقوں میں ووٹرس کے پتوں کا پتہ لگانے کے لیے بی ایل اوز، بوتھ لیول ایجنٹس یعنی BLAs کی مدد حاصل کریں۔ انہوں نے زیرِ التوا معاملات کو مقررہ وقت میں مکمل کرنے کے لیے



اضلاع کو فراہم کیے گئے اضافی لاگ اِنز کا مؤثر استعمال کرنے کی بھی ہدایت دی۔ اس کے علاوہ Un-Mapping اور Anomalies سے متعلق کیس لسٹ سیاسی جماعتوں کے اجلاسوں میں فراہم کرنے اور دعووں و اعتراضات کی مدت کے دوران BLAs کی فعال شرکت کو یقینی بنانے پر زور دیا گیا۔ BLOs، BLO Supervisors اور AEROs کو الیکشن کمیشن آف انڈیا کی گائیڈ لائنز کے مطابق دستاویزات درست طریقے سے اپ لوڈ کرنے کی ہدایت دی گئی۔ کمپیوٹر آپریٹرز کی جانب سے ہونے والی غلطیوں پر متعلقہ EROs اور AEROs کو ذمہ دار قرار دیا جائے گا۔ علاوہ ازیں سپروائزرز کو ہدایت دی گئی کہ ایسے بزرگ افراد اور معذور ووٹرس کے گھروں کا دورہ کریں جہاں ابھی تک سماعت کے مقامات کا احاطہ نہیں کیا گیا ہے۔ ووٹرز کی مدد کے لیے ERO اور DEO سطح پر ہیلپ ڈیسک بھی فعال کر دیے گئے ہیں۔ اجلاس کے دوران چیف الیکٹورل آفیسر نے تمام اضلاع کے DEOs سے نوٹس کی فراہمی، سماعتوں کے شیڈول اور ERO و DEO لاگ اِنز میں زیرِ التوا کیسز کی پیش رفت کا بھی جائزہ لیا۔