سنبھل تشدد رپورٹ اسمبلی میں پیش، ضیاء الرحمٰن برق اور سہیل اقبال کا ذکر، یوگی نے سازش کا کیا دعویٰ

اتر پردیش اسمبلی میں چہارشنبہ کے روز 2024 کے سنبھل تشدد سے متعلق عدالتی کمیشن کی رپورٹ پیش کی گئی، جس میں دعویٰ کیا گیا ہے کہ یہ تشدد پہلے سے منصوبہ بند تھا۔ رپورٹ میں سماجوادی پارٹی کے رکن پارلیمنٹ ضیاء الرحمٰن برق اور پارٹی کے رکن اسمبلی اقبال محمود کے بیٹے سہیل اقبال کے کردار کا بھی ذکر کیا گیا ہے۔رپورٹ کے مطابق مسجد کے سروے کے بارے میں مسلمانوں میں مبینہ طور پر غلط معلومات پھیلائی گئیں، جبکہ ہنگامے کے دوران پولیس پر حملہ کرکے اسلحہ لوٹنے کی بھی کوشش کی گئی۔ رپورٹ میں یہ بھی کہا گیا ہے کہ ہلاکتوں کا سبب بننے والی گولیاں پولیس نے نہیں چلائیں۔یہ رپورٹ 24



نومبر 2024 کو شاہی جامع مسجد کے اے ایس آئی نگرانی میں ہونے والے سروے کے دوران بھڑکنے والے تشدد سے متعلق ہے، جس میں چار افراد ہلاک اور متعدد زخمی ہوئے تھے۔

رپورٹ میں سنبھل کی آبادی میں تبدیلی کا بھی ذکر کرتے ہوئے کہا گیا ہے کہ آزادی کے وقت ہندو آبادی تقریباً 45 فیصد تھی جو اب 15 فیصد رہ گئی ہے، جبکہ مسلم آبادی 85 فیصد بتائی گئی ہے۔

چیف منسٹر یوگی آدتیہ ناتھ نے کہا کہ رپورٹ میں 2024 کے فسادات کی مبینہ سازش کے پہلو سامنے آئے ہیں۔ انہوں نے یہ بھی کہا کہ ریاست "خوشامد کی سیاست" سے نکل کر "اطمینان کی سیاست" کی طرف بڑھ رہی ہے اور کسی بھی قسم کی فرقہ وارانہ کشیدگی کو برداشت نہیں کیا جائے گا۔