دہلی 2 فروری 2026 (اعتماد نیوز) لوک سبھا میں اپوزیشن لیڈر راہول گاندھی کے ایک بیان پر پیر کے روز ایوان میں شدید ہنگامہ دیکھنے میں آیا۔ صدر جمہوریہ کے خطبے پر شکریہ کی تحریک کے دوران بحث میں حصہ لیتے ہوئے راہل گاندھی نے اپنے خطاب کے آغاز میں دعویٰ کیا کہ چینی ٹینک بھارت کے اندر داخل ہو گئے تھے۔ راہول گاندھی کے اتنا کہتے ہی ایوان میں شور مچ گیا۔ وزیردفاع راج ناتھ سنگھ نے فوراً سخت
اعتراض کرتے ہوئے کہا کہ یہ بیان ایوان کو گمراہ کرنے کے مترادف ہے۔ اسی دوران وزیر داخلہ امت شاہ بھی اپنی نشست سے کھڑے ہوئے اور راہول گاندھی کے دعوے کو یکسر مسترد کر دیا۔راہل گاندھی نے سابق آرمی چیف کی کتاب کا حوالہ دیا ۔راہل گاندھی نے اپنے دفاع میں کہا کہ یہ بات انہوں نے کسی افواہ کی بنیاد پر نہیں کہی بلکہ سابق آرمی چیف جنرل منوج مکوند نرونے نے اپنی ایک کتاب میں چینی دراندازی کے حوالے سے یہ بات لکھی ہے۔