ایئرانڈیا حادثہ میں کرشماتی طور پر ایک مسافر محفوظ

احمدآباد،12 جون (ذرائع) گجرات کے احمد آباد میں ایئر انڈیا کا طیارہ گر کر تباہ ہو گیا۔ اس حادثے میں گجرات کے سابق وزیر اعلیٰ وجے روپانی سمیت 200 سے زیادہ لوگوں کے ہلاک ہونے کی تصدیق کی گئی ہے۔ تاہم طیارے میں سفر کرنے والا ایک مسافر محفوظ رہا۔ اسے کسی معجزے سے کم نہیں سمجھا جا رہا ہے۔ وشواس کمار رمیش ایئر انڈیا کی فلائٹ میں سیٹ 11A پر لندن جا رہے تھے۔ حادثے کے فوراً بعد انہیں اسپتال میں داخل کرایا گیا۔40 سالہ وشواس کمار نے ایک انگریزی اخبار  کو بتایا، "جب میں بیدار ہوا تو



میرے اردگرد لاشیں بکھری ہوئی تھیں، میں ڈر گیا، میں کھڑا ہو کر بھاگا، جہاز کے ٹکڑے میرے چاروں طرف بکھرے ہوئے تھے۔ ٹیک آف کے تیس سیکنڈ بعد، جہاز میں بہت تیزی سے یہ شور ہوا اور اس کے بعد تمام لوگ بھاگ گئے۔" وشواس کے سینے، آنکھوں اور ٹانگوں پر چوٹیں ہیں اور ان کا علاج چل رہا ہے۔ ایئر انڈیا کی پرواز، لندن کے گیٹوک کے لیے روانہ ہوئی تھی، بوئنگ 787-8 ڈریم لائنر  عملے کے ارکان سمیت 242 افراد سوار تھے، جمعرات کو دوپہر 1.38 بجے احمد آباد سے اڑان بھری اور منٹوں میں گر کر تباہ ہو گئی اور آگ لگ گئی۔