محمد اظہرالدین 31 اکتوبر کو تلنگانہ کابینہ میں وزیر کے طور پر حلف لیں گے

ذرائع:

ہندوستانی کرکٹ ٹیم کے سابق کپتان اور کانگریس کے سینئر رہنما محمد اظہرالدین 31 اکتوبر کو تلنگانہ کابینہ میں وزیر کے طور پر حلف لینے والے ہیں۔ کرکٹ کے میدان سے سیاست کے ایوان تک ان کا یہ سفر ایک نئی سیاسی منزل کی علامت سمجھا جارہا ہے۔اظہرالدین کو گورنر کوٹہ کے تحت قانون ساز کونسل کا رکن نامزد کیا گیا ہے، جس کے بعد ان کی کابینہ میں شمولیت یقینی ہوگئی۔ دلچسپ بات یہ ہے کہ کچھ ہفتے قبل انہوں نے جوبلی ہلز اسمبلی کے ضمنی انتخاب میں حصہ لینے کا اعلان کیا تھا، لیکن پارٹی کی حکمتِ عملی میں تبدیلی کے نتیجے میں اب انہیں وزارتی ذمہ داری دی جارہی ہے۔ذرائع



کے مطابق کانگریس حکومت نے اظہرالدین کے ساتھ پروفیسر کودنڈارام کا نام بھی گورنر کو سفارش کیا ہے تاکہ پارٹی میں توازن اور بااعتماد قیادت کو موقع دیا جاسکے۔ اظہرالدین کی کابینہ میں شمولیت کو اقلیتی طبقہ میں کانگریس کی مقبولیت بڑھانے کی کوشش کے طور پر دیکھا جارہا ہے۔ ان کا کرکٹ کی دنیا میں شاندار مقام اور ریاستی سیاست میں سرگرم کردار انہیں ایک نمایاں شخصیت بناتا ہے۔ حلف برداری کی تقریب 31 اکتوبر کو راج بھون حیدرآباد میں متوقع ہے، جس میں سینئر کانگریس قائدین اور معززین شرکت کریں گے۔ ذرائع کے مطابق اظہرالدین کو نوجوانوں کے امور، کھیل یا اقلیتی بہبود سے متعلق محکمہ دیا جاسکتا ہے، تاہم سرکاری اعلان ابھی باقی ہے۔