ٹرمپ کی موجودگی میں مودی بولے:ہندوستان -پاکستان کے درمیان ثالثی منظور نہیں

بیئیرٹز(فرانس)،26اگست(ایجسنی)وزیراعظم نریندرمودی نے آج امریکی صدر ڈونالڈ ٹرمپ کی موجودگی میں دو ٹوک الفاظ میں کہا کہ ہندوستان اور پاکستان کے درمیان سبھی مسئلے دوطرفہ ہیں اور ان میں کسی تیسرے فریق کا کوئی رول نہیں ہے۔

مسٹر مودی نے جی -7ملکوں کے چوٹی کانفرنس سے الگ مسٹر ٹرمپ کے ساتھ مشترکہ پریس کانفرنس میں کہا،’’ہندوستان اور پاکستان کے درمیان سبھی مسئلے دوطرفہ ہیں اور ہم دنیا کے کسی بھی ملک کو زحمت نہیں دینا چاہتے۔مجھے یقین ہے کہ ہندوستان اور پاکستان جو 1947سے پہلے ایک ہی تھے،مل کر سبھی



مسئلوں پر بات چیت بھی کرسکتے ہیں اور ان کا حل بھی نکال سکتے ہیں۔‘‘

کشمیر مسئلے پر ثالثی کی پیش کش کر چکے مسٹر ٹرمپ نے مسٹر مودی کی بات سے اتفاق ظاہر کرتے ہوئے کہا کہ ہندوستان اور پاکستان اپنے مسئلے خود سلجھالیں گے۔

وزیراعظم نے کہاکہ پاکستانی وزیراعظم عمران خان کے الیکشن جیتنے کے وقت انہوں نے ٹیلی فون پر ان سے کہا تھا کہ پاکستان کو اور ہندوستان دونوں کو غریبی ،ناخواندگی اور بیماریوں سے لڑنا ہے۔دونوں ملک مل کر غریبی اور پریشانیوں سے لڑیں اور دونوں کے عوام کی بھلائی کے لئے مل کر کام کریں۔