مودی نے غیرمقیم ہندوستانیو سے ’میڈ اِن انڈیا‘ اپنانے کی اپیل کی

نئی دہلی ،9 جنوری (یواین آئی) وزیر اعظم نریندر مودی نے ملک کی تہذیب اور ثقافت کی بیرون ملک اپنی منفرد شناخت بنانے کے لئے بیرون ممالک میں رہ رہے ہندوستانیو کی تعریف کرتے ہوئے ان سے ’میڈ ان انڈیا‘ مصنوعات کا استعمال کرنے کی آج اپیل کی تاکہ ’برانڈ انڈیا‘ کی شناخت کو مزید تقویت مل سکے ۔

’پرواسی بھارتیہ دوس‘ پر منعقدہ ایک ورچوئل پروگرام میں مسٹر مودی نے کہا ’’ آج جب ہندوستان خود انحصار بننے کے لئے آگے بڑھ رہا ہے ، تو یہاں بھی برانڈ انڈیا کی پہچان کو مضبوط بنانے میں آپ کا کردار اہم ہے۔ جب آپ میڈ اِن انڈیا مصنوعات کا زیادہ سے زیادہ



استعمال کریں گے ، تب آپ کے آس پاس رہنے والوں میں بھی ان پر اعتماد بڑھے گا ۔ انہوں نے کہا کہ یہ میڈ ان انڈیا مصنوعات چائے سے لے کر کپڑوں اورادویات تک کچھ بھی ہوسکتی ہیں ۔ اس سے ملکی برآمدات میں اضافہ ہوگا۔

وزیر اعظم نے ملک میں سرمایہ کاری کرنے ، بیرون ملک کمائی گئی رقم ملک میں بھیج کر ملک کی ترقی میں تعاون دینے اور کووڈ 19 وبا کے دوران پی ایم کیئرس فنڈ میں عطیہ دینے کے کئے غیرمقیم ہندوستانیوں کی تعریف کی اور کہا کہ آج کھانا ہو یا فیشن ، خاندانی یا کاروباری اقدار ہوں ، بیرون ملک میں مقیم ہندوستانیوں نے پوری دنیا میں ہندوستانیت کی تشہیرکی ہے ۔