دارالسلام میں میلاد النبی ﷺ کے سالانہ جلسے کی تیاریاں زور و شور سے جاری

کل ہند مجلس اتحاد المسلمین کے صدر دفتر دارالسلام کے احاطے میں میلاد النبی ﷺ کے موقع پر منعقد ہونے والے سالانہ جلسے کی تیاریاں زور و شور سے جاری ہیں۔ اس سلسلے میں کل ہند مجلس اتحاد المسلمین کے ایم ایل سی جناب مرزا رحمت  بیگ قادری اور ملے پلی کے سابق کارپوریٹر جناب ظفر خان نے اعتماد ٹی وی کے ذریعے گفتگو کرتے ہوئے سالانہ جلسے کی تیاریوں کے حوالے سے تفصیلات سے واقف کروایا۔ اس موقع پر انہوں نے جلسہ گاہ کا ازخود تفصیلی جائزہ لیا اور انتظامات کا معائنہ کیا۔ خاص طور پر بارش کے پیش نظر پنڈال کے انتظامات، شرکاء کے لیے سہولیات، خواتین کے لیے علیحدہ اور



مناسب انتظامات سمیت دیگر تمام امور کا جائزہ لیا گیا۔ مرزا رحمت  بیگ قادری اور ظفر خان نے بتایا کہ عاشقانِ رسول ﷺ کی بڑی تعداد میں شرکت کے پیش نظر انتظامات کو حتمی شکل دی جا رہی ہے، تاکہ جلسے میں شرکت کرنے والے افراد کو کسی قسم کی دشواری کا سامنا نہ کرنا پڑے۔انہوں نے اعتماد ٹی وی کے ذریعے امتِ مسلمہ اور تمام عاشقانِ رسول ﷺ سے اپیل کی کہ وہ میلاد النبی ﷺ کے اس بابرکت سالانہ جلسے میں کثیر تعداد میں شرکت کریں اور محفلِ میلاد کی برکات سے فیضیاب ہوں۔ جلسے کے انتظامات کو بہتر سے بہتر بنانے کے لیے متعلقہ ذمہ داران کی جانب سے تمام ضروری اقدامات کو یقینی بنایا جا رہا ہے۔