مدینہ بس سانحہ: مسجد نبویؐ میں نماز جنازہ اور جنت البقیع میں تدفین کی منظوری

مسجد نبوی ؐ میں آج بعد نماز جمعہ مدینہ بس حادثے کے شہیدوں کی نماز جنازہ

جنت البقیع میں تدفین کے انتظامات۔ حکومت ہند اور حکومت تلنگانہ کے وفد کی کامیاب نمائندگی 

مدینہ منورہ۔20/نومبر۔مدینہ۔ بدر بس سانحہ میں شہید حیدرآبادی معتمرین کی نماز جنازہ مسجد نبویؐ میں کل 21 نومبر کوبعد نماز جمعہ ادا کی جائے گی۔ حکومت ہند اور حکومت تلنگانہ کی جانب سے سعودی حکام سے نمائندگی کی گئی تھی کہ مکہ مکرمہ سے مدینہ منورہ جاتے ہوئے راستے میں حادثے میں شہید ہونے والے تمام معتمرین نماز جنازہ کی مسجد نبوی میں ادائیگی اور جنت البقیع قبرستان میں تدفین کی اجازت دی جائے۔ حکومت ہند اور حکومت تلنگانہ کی نمائندگی قبول کرتے ہوئے سعودی حکام نے ضروری کارروائی کا آغاز کردیا ہے۔ اس اثناء میں شہیدوں کے 38 ارکان خاندان مدینہ منورہ پہنچ گئے جن کے سفر قیام و طعام



کا حکومت تلنگانہ کی جانب سے انتظام کیا گیا اورسوگوار خاندانوں کو ضروری امداد و سہولتیں فراہم کی جارہی ہیں۔ حکومت ہند کے ایک اعلی سطحی وفد جس کی قیادت گورنر آندھر اپردیش جناب عبد النذیر کر رہے ہیں۔ سعودی عرب میں ہندوستانی سفیر ڈاکٹر سہیل اعجاز خان اور جناب ارون کمار چٹرجی سکریٹری (CPV-OIA)کے ساتھ تلنگانہ کے وفد جو محمد اظہر الدین  وزیر برائے اقلیتی بہبود، جناب ماجد حسین، ایم ایل اے اور جناب بی شفیع اللہ، سکریٹری برائے حکومت تلنگانہ نے سعودی حکام کے ساتھ ضروری اقدامات کے سلسلے میں اجلاس منعقد کیا۔ یہ پہلا موقع ہے کہ حیدرآباد کے 42 مرحومین کی اجتماعی نماز جنازہ مسجد نبوی ؐ میں ادا کی جارہی ہے۔ جناب اظہر الدین نے حکومت تلنگانہ بالخصوص چیف منسٹر ریونت ریڈی سے اظہار تشکر کیا جنہوں نے شہیدوں کے سوگوار خاندانوں کے ساتھ ہمدردی اور یگانگت کا اظہار کیا اور ایکس گریشیا کا انتظام کیا۔ اور ہر قسم کی سہولتیں فراہم کیں۔