خیریت آباد ڈی سی پی کا پنجہ گٹہ پولیس اسٹیشن کا اچانک معائنہ

حیدرآباد 14 فروری 2026 (اعتماد نیوز) حیدرآباد کے خیریت آباد زون کی ڈی سی پی کے شلپا ولی نے زمینی سطح پر پولیس کی کارکردگی کا جائزہ لینے کے لئے ایک منفرد قدم اٹھاتے ہوئے پنجہ گٹہ پولیس اسٹیشن کا اچانک معائنہ کیاجمعرات کی دیر رات ڈی سی پی نے اپنی سرکاری گاڑی اور سیکورٹی ملازمین کو کچھ فاصلہ پر چھوڑا اور عام شہری کے لباس میں خاموشی سے پولیس اسٹیشن میں داخل ہوئیں۔انہوں نے اپنی شناخت ظاہر



کئے بغیر ریسیپشن ایریا میں ایک عام سائل کی طرح بیٹھ کر عملہ کے رویہ اور آنے والوں کے ساتھ ان کے برتاؤ کا مشاہدہ کیا۔ بتایا گیا ہے کہ انہوں نے تقریباً ڈیڑھ گھنٹے تک پولیس اسٹیشن کے نظام اور عملہ کی چوکسی پر نظر رکھی۔بعد ازاں، ڈی سی پی نے اپنی شناخت ظاہر کی اور متعلقہ سرکل انسپکٹر اور اے سی پی کو طلب کر کے عوام کے ساتھ برتاؤ، کارکردگی اور پیشہ ورانہ طرز عمل کو بہتر بنانے کے سلسلہ میں ضروری ہدایات دیں۔