حیدرآباد: عید میلاد النبی ﷺ پر باچو پلی 2BHK میں اتحاد و بھائی چارے کا خوبصورت مظاہرہ

شہر حیدرآباد کے حلقہ قطب اللہ پور میں واقع باچو پلی ڈبل بیڈروم مکانات میں عید میلاد النبی ﷺ کے موقع پر گنگا جمنا تہذیب کی ایک خوبصورت مثال دیکھنے کو ملی۔

تلنگانہ حکومت کی جانب سے غریب اور مستحق خاندانوں کے لیے فراہم کیے گئے ان ڈبل بیڈروم مکانات کے رہائشیوں نے مذہب اور ذات پات سے بالاتر ہوکر عید میلاد النبی ﷺ کا تہوار نہایت جوش و خروش اور عقیدت کے ساتھ منایا۔ اس موقع پر ہندو، مسلم اور عیسائی برادری سے تعلق رکھنے والے افراد نے ایک ساتھ شرکت کی۔ ذکر و اذکار سے لے کر تناولِ طعام تک، مختلف مذاہب کے ماننے



والوں نے باہمی بھائی چارے اور محبت کا مظاہرہ کرتے ہوئے پروگرام میں بڑھ چڑھ کر حصہ لیا۔ اس خوبصورت پروگرام کا انعقاد آل انڈیا مجلس اتحاد المسلمین کے مقامی کارکنان کی جانب سے کیا گیا، جس میں باچو پلی ڈبل بیڈروم کے مقامی صدر محمد مجاہد، خواجہ احمد، 276 ڈویژن کے صدر عبدالعتیق اور دیگر کارکنان نے اہم کردار ادا کیا۔ پروگرام میں عوام کی کثیر تعداد نے شرکت کی اور عید میلاد النبی ﷺ کے پُرمسرت موقع پر خوشی کا اظہار کیا۔ باچو پلی ڈبل بیڈروم میں منایا گیا یہ میلاد پروگرام مذہبی ہم آہنگی، باہمی محبت اور اتحاد کی ایک خوبصورت مثال بن کر سامنے آیا۔