حیدرآباد 24 فروری 2026 (اعتماد نیوز) حیدرآباد شہر میں آدھی رات کے بعد مختلف علاقوں میں تیز بارش ہوئی جس کے باعث حکام نے الرٹ جاری کرتے ہوئے بعض مقامات پر احتیاطاً برقی کی سربراہی معطل کر دی۔ شدید بارش سے حدِ نگاہ متاثر ہوئی اور شہریوں کی آمد و درفت میں مشکلات پیش آئی ، جس پر انتظامیہ نے غیر ضروری سفر سے گریز کی ہدایت دی۔سکندرآباد، بشیر باغ،
الوال، جوبلی ہلز، پنجہ گٹہ اور منی کونڈا سمیت کئی علاقوں میں بارش ریکارڈ کی گئی جبکہ نشیبی مقامات پر پانی جمع ہونے کی اطلاعات ملیں۔ ابتدائی طور پر کسی جانی یا بڑے مالی نقصان کی اطلاع نہیں ہے۔محکمہ موسمیات کے مطابق گریٹر حیدرآباد کے شمالی اور مغربی زونز میں مزید بارش کا امکان ہے، جس کے پیش نظر متعلقہ محکموں اور ہنگامی ٹیموں کو چوکس رہنے کی ہدایت دی گئی ہے۔