توانائی بحران کے پیشِ نظر 21 ریاستوں میں کیروسین کی فراہمی کی اجازت

حکومتِ ہند نے ایک اہم فیصلہ کرتے ہوئے گزٹ نوٹیفکیشن جاری کیا ہے، جس کے تحت ملک کی 21 ریاستوں اور مرکز کے زیر انتظام علاقوں میں پبلک ڈسٹری بیوشن سسٹم کے تحت سپیریئر کیروسین آئل کی تقسیم کی اجازت دے دی گئی ہے۔ یہ اقدام عالمی سطح پر جاری جغرافیائی و سیاسی حالات کے باعث توانائی کی فراہمی میں پیدا ہونے والی مشکلات کو مدنظر رکھتے ہوئے کیا گیا ہے۔

وزارتِ پیٹرولیم و قدرتی گیس کے مطابق، ان علاقوں میں جہاں عام حالات میں کیروسین کا استعمال ختم کر دیا گیا تھا، اب گھریلو ضروریات جیسے کھانا پکانے اور روشنی کے لیے اس کی فراہمی دوبارہ ممکن بنائی جائے گی۔

نوٹیفکیشن کے تحت، کیروسین سے پاک ریاستوں اور یو ٹی میں مخصوص پیٹرول



پمپس کو سپیریئر کیروسین آئل ذخیرہ کرنے اور تقسیم کرنے کی اجازت دی گئی ہے۔ ہر ضلع میں زیادہ سے زیادہ دو فیول اسٹیشنز، ترجیحاً سرکاری آئل کمپنیوں کے زیرِ انتظام، پانچ ہزار لیٹر تک کیروسین ذخیرہ کر سکیں گے۔

مزید برآں، ڈیلرز اور ٹرانسپورٹرز کو تیز رفتار ترسیل کو یقینی بنانے کے لیے بعض لائسنسنگ تقاضوں سے بھی استثنیٰ دیا گیا ہے، تاہم حفاظتی اور نگرانی کے اصول بدستور نافذ رہیں گے۔

وزارت نے واضح کیا ہے کہ یہ سہولت صرف گھریلو استعمال یعنی کھانا پکانے اور روشنی کے لیے فراہم کی جائے گی۔ اس فیصلے کا اطلاق دہلی، اتر پردیش، گجرات اور راجستھان سمیت 21 ریاستوں اور یو ٹی میں ہوگا۔

یہ نوٹیفکیشن فوری طور پر نافذ العمل ہو چکا ہے اور 60 دنوں تک یا آئندہ احکامات تک مؤثر رہے گا۔