یومِ دارالسلام: مجلس کے مرکزی دفتر میں عظیم الشان جلسہ، مہاراشٹر سے قافلوں کی آمد متوقع

آل انڈیا مجلس اتحاد المسلمین کے مرکزی ہیڈکوارٹر دارالسلام میں کل ’’یومِ دارالسلام‘‘ کے موقع پر بڑے پیمانے پر عظیم الشان جلسہ عام منعقد کیا جا رہا ہے۔ اس اہم اجتماع کی تیاریاں مکمل کر لی گئی ہیں اور پارٹی کارکنان میں زبردست جوش و خروش پایا جا رہا ہے۔

اطلاعات کے مطابق مہاراشٹر سے مجلس کے تمام کارپوریٹرس اپنے صدر امتیاز جلیل کی قیادت میں قافلوں کی صورت میں حیدرآباد پہنچ رہے ہیں تاکہ اس تاریخی جلسے میں شرکت کر سکیں۔ مختلف اضلاع سے بھی کارکنان کی بڑی تعداد دارالسلام کا رخ کر رہی ہے۔

ذرائع



کے مطابق جلسہ گاہ میں وسیع انتظامات کیے گئے ہیں، جن میں اسٹیج کی تیاری، سکیورٹی کے خصوصی اقدامات، پارکنگ کے انتظامات اور شرکاء کے لیے سہولیات شامل ہیں۔ پارٹی ذمہ داران کا کہنا ہے کہ لاکھوں افراد کی شرکت متوقع ہے اور دارالسلام کا میدان عوام کے سمندر کا منظر پیش کرے گا۔

یومِ دارالسلام کے اس جلسہ عام سے پارٹی قیادت اہم خطاب کرے گی اور آئندہ کے لائحہ عمل پر روشنی ڈالے گی۔ کارکنان اور عوام میں اس اجتماع کے حوالے سے غیر معمولی جوش و جذبہ دیکھا جا رہا ہے، جبکہ شہر بھر میں استقبالی بینرز اور خیرمقدمی پوسٹرز آویزاں کیے گئے ہیں۔