سنبھل میں قبرستان کی زمین پر مبینہ غیر قانونی عیدگاہ کے خلاف بلڈوزر کارروائی

اتر پردیش کے ضلع سنبھل کے مدھن گاؤں میں منگل کے روز انتظامیہ نے مبینہ طور پر قبرستان کی زمین پر تعمیر کی گئی ایک غیر قانونی عیدگاہ کے خلاف انہدامی کارروائی انجام دی۔

حکام کے مطابق یہ کارروائی تحصیلدار کی عدالت کے حکم پر اتر پردیش ریونیو کوڈ کی متعلقہ دفعات کے تحت کی گئی۔ ریونیو محکمہ نے پولیس کی موجودگی میں بلڈوزر کے ذریعے مبینہ تجاوزات کو ہٹانے کا عمل شروع کیا۔

انتظامیہ کا کہنا ہے کہ متنازعہ عیدگاہ پلاٹ نمبر 208 پر تعمیر کی گئی تھی، جس کا رقبہ تقریباً 70 مربع میٹر ہے۔ تحصیلدار



دھیریندر پرتاپ سنگھ کے مطابق پلاٹ نمبر 208، 210، 218 اور 417 اصل میں قبرستان کے لیے مختص تھے۔ ان کا کہنا ہے کہ پلاٹ نمبر 210 آج بھی قبرستان کے طور پر استعمال ہو رہا ہے، جبکہ پلاٹ نمبر 208 کا استعمال تبدیل کرکے مبینہ طور پر عیدگاہ تعمیر کی گئی۔

حکام کے مطابق بعض مقامی دیہاتیوں نے قبرستان کی زمین سے تجاوزات ہٹانے کا مطالبہ کیا تھا، جس کے بعد عدالتی حکم کی روشنی میں کارروائی عمل میں لائی گئی۔

قانون و نظم برقرار رکھنے کے لیے موقع پر پولیس کی بھاری نفری تعینات کی گئی، جبکہ انتظامیہ نے بتایا کہ اس معاملے میں مزید قانونی کارروائی بھی جاری ہے۔