سکھ مخالف فسادات: ڈھینگرا کمیٹی نے رپورٹ سونپی

نئی دہلی‘29نومبر (یو این آئی) سال 1984 کے سکھ مخالف فسادات کی جانچ کررہی خصوصی تفتیشی ٹیم (ایس آئی ٹی) نے 186 معاملات کی انکوائری کرکے اس کی رپورٹ جمعہ کو ایک مہر بند لفافہ میں سپریم کورٹ کو سونپ دی۔

اس ایس آئی ٹی کی تشکیل عدالت عظمی نے ہی کی تھی۔ ایس آئی ٹی کو ان معاملات کو دوبارہ کھولنے اور جانچ کرنے کے احکامات دئے گئے تھے جنہیں پولیس نے طریقہ کار پر مکمل عمل کئے بغیر بند کردیا تھا۔

عدالت عظمی اس



معاملے میں دو ہفتے بعد فیصلہ دے گی کہ اسے عام کیا جائے یا نہیں۔ ساتھ ہی ایسے کتنے معاملے ہیں جنہیں پھر سے کھولا جائے۔

اس ایس آئی ٹی ٹیم کی تشکیل پچھلے سال فروری میں کی گئی تھی۔جس کی صدارت دہلی ہائی کورٹ کے سابق جج جسٹس شیو نارائن ڈھینگرا کو دی گئی تھی۔ ان کی ٹیم میں آئی پی ایس افسر راج دیپ سنگھ اور ابھیشیک دلارے شامل تھے۔ایس آئی ٹی نے مسلسل جانچ کے بعد بالآخر اپنی رعورٹ مہر بند لفافے میں سپریم کورٹ کو سونپ دی ہے۔