تلنگانہ کے توپران میں گاؤ رکشکوں کا حملہ، مجلس کی سخت کارروائی

تلنگانہ کے ضلع میدک کے توپران پولیس اسٹیشن کی حدود میں دو روز قبل ایک نہایت افسوسناک واقعہ پیش آیا۔ اطلاعات کے مطابق بجرنگ دل کے نام پر خود کو گاؤ رکشک بتانے والے چند افراد نے چیک پوسٹ گیٹ کے قریب ایک گاڑی کو روک لیا اور اس میں موجود ڈرائیور اور مالک پر ہتھیاروں سے حملہ کر دیا، جس کے نتیجے میں وہ شدید زخمی ہو گئے۔ بتایا گیا ہے کہ مذکورہ گاڑی میں جانور منڈی سے خرید کر لے جائے جا رہے تھے۔اس واقعے کی اطلاع ملتے ہی صدر مجلس بیرسٹر اسدالدین اویسی نے فوری طور پر سپرنٹنڈنٹ آف پولیس، میدک سے رابطہ قائم



کرتے ہوئے معاملے کی سنگینی پر سخت تشویش کا اظہار کیا اور ذمہ دار افراد کے خلاف سخت قانونی کارروائی کا مطالبہ کیا۔ بعد ازاں صدر مجلس کی ہدایت پر ایم ایل سی مرزا رحمت بیگ قادری اور سابق کارپوریٹر ظفر خان فوری طور پر توپران پہنچے، جہاں انہوں نے ڈی ایس پی نریندر گوڑ سے ملاقات کرتے ہوئے اس واقعے پر سخت احتجاج درج کیا۔ وفد نے ڈی ایس پی کو واقعے کی تفصیلات سے آگاہ کیا اور زخمی ڈرائیور سے بھی ملاقات کی۔ انہوں نے حملے میں ملوث نام نہاد گاؤ رکشکوں کے خلاف سخت قانونی کارروائی کرنے اور متاثرین کو انصاف فراہم کرنے کا مطالبہ کیا۔