اسلامی مبلغ مولانا طارق جمیل کورونا سے متاثر

اسلام آباد ، 14 دسمبر (یواین آئی) پاکستان کے مشہوراسلامی مبلغ مولانا طارق جمیل کو کورونا وائرس کووڈ19 سے متاثر ہونے کے بعد اسپتال میں داخل کرایا گیا ہے مولانا طارق جمیل (67) کو اتوار کو اسپتال میں داخل کرایا گیا۔ انہوں نے ٹویٹ کیاکہ "میں گزشتہ کچھ دنوں سے صحتمند محسوس نہیں کر رہا ہوں اور اپنا کووڈ ۔19 ٹیسٹ کرایا، رپورٹ مثبت آئی ہے اور میں ڈاکٹر کے مشورے پر اسپتال میں داخل ہوں۔"

انہوں نے اپنے مداحوں سے دعا کی درخواست کی ہے۔ پاکستانی وزیر اعظم عمران خان نے ٹوئٹر کے ذریعہ معروف شخصیت کی صحت یابی کی دعا کی۔ مسٹر عمران خان نے لکھاکہ "وہ کووڈ۔ 19 سے متاثر مولانا طارق جمیل کی جلد اور مکمل صحت یابی کے لئے دعا کرتے ہیں"۔

مولانا جمیل کو پاکستانی فوج کے نزدیک سمجھا جاتا ہے اور وہ دیوبندی مسلک کے سب سے مشہور مبلغوں میں سے ایک ہیں۔ ان کا تعلق تبلیغی جماعت سے ہے ۔ مولانا جمیل سے متاثر ہوکر مقبول گلوکار جنید جمشید ، کرکٹر انضمام الحق اور سعید انور ان کے پیروکار بن گئے ہیں۔