ہندی فلموں کی نامور رقاصہ مینو ممتاز کا کینیڈا میں انتقال

ممبئی 23؍ اکتوبر (یو این آئی) ہندی فلموں کی ناموررقاصہ مینوممتازجو’’ریشمی شلوار والی ‘‘ لڑکی کے نام پر مشہور تھیں، ان کا آج صبح کینیڈا میں انتقال ہو گیا ۔

یہ اطلاع آج یہاں ان کے بھائی انور علی نے ممبئی میں دی اور کہا کہ ان کی پیاری بہن مینو ممتاز کا چند گھنٹوں قبل کینیڈا میں انتقال ہو گیا ہے ۔

مینو مشہور مزاحیہ اداکار محمود کی سگی بہن تھیں اور اس کا اصل نام ملک النسا تھا ۔

ہندی فلموں میں اپنے مخصوص انداز کے رقص کے لئے مشہور مینو نے اپنی اداکاری کا آغاز اسٹیج شو سے کیا اور پھر وہ اپنے والد ممتاز علی کی جانب سے لکھے گئے کئی ایک نغموں پر بھی رقص کر



چکی ہیں ۔

ممبئی کے مضافات ملاڈ کے نڈیاڈ والا کمپاونڈ میں رہائش پذیر مینو کو رقص میں مہارت تھی اور ۱۹۵۰؍کے اوائل سے انہوں نے ہندی فلموں میں اپنی اداکاری کے جوہر بکھیرے ۔

مرحوم اداکارہ مینا کماری نے ملک النسا کو مینو نام رکھنے کا مشورہ دیا تھا اور اس پر عمل کرنے کے بعد انہوں نے کبھی پیچھے مڑ کر نہیں دیکھا اور ایک کے بعد ایک کئی ایک ہٹ ہندی فلموں میں ڈانس کیا ۔

۱۰۰؍سے زائد فلموں میں کام کرنے کا شرف رکھنے والی مینو کو ۱۹۵۷؍میں ُبنی نیا دور فلم کے مشہور نغمے ریشمی شلوار کرتا جالی کا ۔۔۔پر رقص کرنے کیلئے جانا جاتا ہے ۔ یہ نغمہ آشا بھونسلے اور شمشاد بیگم نے گایا تھا ۔