تلنگانہ (29 اپریل 2026) تلنگانہ کے دسویں جماعت کے نتائج جاری کر دیے گئے ہیں۔ لڑکیوں نے لڑکوں پر بازی مارلی۔ حکومت کے مشیر کے. کیشوراؤ، محکمہ تعلیم کی سیکریٹری یوگیتا رانا اور اسکول ایجوکیشن ڈائریکٹر ڈاکٹر نوین نکولس نے بدھ کی دوپہر نتائج کا اعلان کیا۔ان نتائج میں لڑکیوں کی برتری برقرار رہی ہے۔ کامیاب ہونے والے طلبہ کو کے کے نے مبارکباد دی۔ انہوں نے کہا کہ جو طلبہ کامیاب نہیں ہو سکے وہ وقتی جذبات میں آ کر کوئی سخت قدم نہ اٹھائیں، بلکہ سپلیمنٹری امتحانات کی بہتر
تیاری کر کے دوبارہ کامیابی حاصل کریں۔اس سال دسویں جماعت کے امتحانات 14 مارچ سے 16 اپریل تک منعقد ہوئے تھے جن میں 5,28,239 طلبہ نے شرکت کی۔ ان میں سے 4,97,312 طلبہ کامیاب قرار پائے۔یوگیتا رانا کے مطابق لڑکیوں کا پاس فیصد 96.26 رہا جبکہ لڑکوں کا 94.07 فیصد رہا۔ 5,731 اسکولوں کے طلبہ نے 100 فیصد کامیابی حاصل کی۔ تاہم 6 پرائیویٹ اسکولوں میں ایک بھی طالب علم پاس نہیں ہو سکا۔معلومات کے مطابق مولوگو ضلع کے طلبہ نے سب سے بہتر کارکردگی دکھائی جبکہ 89.23 فیصد پاس ریکارڈ کے ساتھ حیدرآباد ضلع سب سے آخر میں رہا۔