وشاکھاپٹنم میں ایل کے جی کے طالب علم کی موت، ٹیچر پر مارپیٹ کا الزام

آندھرا پردیش کے وشاکھاپٹنم میں ایک افسوسناک واقعہ سامنے آیا ہے، جہاں ایک چھ سالہ ایل کے جی طالب علم کی اسکول میں مبینہ طور پر ٹیچر کی مارپیٹ کے بعد طبیعت بگڑنے سے موت ہوگئی۔ متوفی طالب علم کی شناخت پرنے تیج کے طور پر ہوئی ہے۔ اہلِ خانہ کا الزام ہے کہ ہوم ورک مکمل نہ کرنے پر ٹیچر نے بچے کو مبینہ طور پر مارا۔ خاندان کے مطابق، واقعے کے بعد پرنے تیج خوفزدہ ہوگیا، رونے اور کھانسنے لگا اور اچانک ٹیچر کے اوپر گر پڑا۔ بچے کو فوری طور پر علاج کے لیے اسپتال منتقل



کیا گیا، تاہم ڈاکٹروں نے اسے مردہ قرار دے دیا۔واقعے کے بعد والدین اور اہلِ خانہ نے اسکول کی سی سی ٹی وی فوٹیج دیکھنے کے بعد شدید غم و غصے کا اظہار کیا اور اسکول کے باہر احتجاج کیا۔ اہلِ خانہ نے واقعے کی مکمل تحقیقات اور ذمہ دار افراد کے خلاف سخت کارروائی کا مطالبہ کیا ہے۔ اس واقعے نے کم عمر بچوں کے ساتھ اسکولوں میں ہونے والے مبینہ سلوک اور ان کی حفاظت پر سنگین سوالات کھڑے کردیئے ہیں۔ پولیس اور متعلقہ حکام معاملے کی تحقیقات کر رہے ہیں، جبکہ بچے کی موت کی اصل وجہ کا تعین طبی اور پوسٹ مارٹم رپورٹ کے بعد ہی ہوسکے گا۔