تلنگانہ کے وقارآباد ضلع میں گرام پنچایت انتخابات کے لیے کاغذات نامزدگی کی چوری

تلنگانہ کے وقارآباد ضلع میں اُس وقت سنسنی پھیل گئی جب نامعلوم افراد نے گرام پنچایت دفتر کے تالے توڑ کر نامزدگی فارم چوری کر لیے۔ یہ واقعہ تانڈور اسمبلی حلقہ کے پڈّی ایمول منڈل کے گوٹلا پلی گرام پنچایت میں پیش آیا۔

اطلاعات کے مطابق چوروں نے رات کی تاریکی میں گوٹلا پلی پولنگ اسٹیشن کے تالے توڑے اور نامینیشن کلسٹر میں رکھے گئے تمام نامزدگی فارم



اٹھا کر فرار ہوگئے۔ فارم غائب ہونے کے بعد سرپنچ اور وارڈ ممبر کے امیدواروں میں شدید بے چینی پیدا ہوگئی اور وہ احتجاج کرتے ہوئے باہر جمع ہوگئے۔

گوٹلا پلی، ہنما پور، گیرمّا پور اور جیارام ٹانڈا (I) کے امیدواروں کے احتجاج پر عہدیدار اور پولیس فوری موقع پر پہنچے۔ عہدیداروں نے امیدواروں کو یقین دہانی کرائی کہ تمام نامینیشن فارم اور ڈیٹا پہلے ہی اسکین کرکے محفوظ کیا جا چکا ہے، اس لیے گھبرانے کی کوئی ضرورت نہیں۔