تلنگانہ: آرمور میں اردو استاد پر مبینہ حملہ، بی جے پی کارکنوں کے خلاف کارروائی کا مطالبہ

تلنگانہ کے ضلع آرمور میں ایک اردو استاد کے ساتھ مبینہ طور پر مارپیٹ کا معاملہ سامنے آیا ہے، جس کے بعد علاقے میں شدید غم و غصہ پایا جا رہا ہے۔

اطلاعات کے مطابق، زیارت نگر کے رہائشی اردو استاد عامر بھارت چندرا اسکول میں طلبہ کو اردو پڑھا رہے تھے، اسی دوران مبینہ طور پر بی جے پی سے وابستہ چند افراد اسکول میں داخل ہوئے، استاد کے ساتھ بدتمیزی کی اور پولیس اہلکاروں کی موجودگی میں انہیں تھپڑ مارا۔

بتایا جا رہا ہے کہ تلنگانہ میں اردو دوسری



سرکاری زبان ہے، اسی لیے اسکول میں طلبہ کے لیے اردو کی تعلیم کا انتظام کیا گیا تھا۔

واقعے کے بعد اردو اساتذہ، سماجی تنظیموں اور مقامی شہریوں نے سخت مذمت کرتے ہوئے مطالبہ کیا ہے کہ ذمہ دار افراد کے خلاف مقدمہ درج کر کے سخت قانونی کارروائی کی جائے۔ ان کا کہنا ہے کہ دورانِ تدریس کسی استاد پر حملہ نہ صرف قابلِ مذمت ہے بلکہ تعلیمی ماحول کو بھی متاثر کرتا ہے۔

پولیس نے شکایت موصول ہونے کی تصدیق کرتے ہوئے کہا ہے کہ معاملے کی تحقیقات جاری ہیں اور تفتیش مکمل ہونے کے بعد قانون کے مطابق مناسب کارروائی کی جائے گی۔