بیٹے کی خواہش میں شوہر نے بیوی اور دو بیٹیوں کو قتل کر دیا، تلنگانہ میں لرزہ خیز واردات

تلنگانہ کے ہنکمنڈہ ضلع کے آئینوولو منڈل کے پُنیلو گاؤں میں ایک دل دہلا دینے والا واقعہ پیش آیا، جہاں ایک شخص نے بیٹے کی خواہش میں اپنی بیوی اور دو معصوم بیٹیوں کو بے رحمی سے قتل کر دیا۔پولیس کے مطابق، گاؤں کا رہنے والا 28سالہ اظہرالدین اور 26سالہ فرحت  شوہر اور بیوی ہیں اور ان کی دو بیٹیاں، عمیرہ (8) اور عائشہ (6) تھیں۔ ملزم گاؤں کے مضافات میں ورنگل-کھمم نیشنل ہائی وے کے قریب ایک سوئمنگ پول چلا کر اپنے خاندان کی کفالت کرتا تھا۔بتایا گیا ہے کہ دو بیٹیوں کے بعد بھی وہ بیٹے کی خواہش رکھتا تھا۔ اسی دوران جب بیوی دو مرتبہ حاملہ ہوئی تو لڑکی پیدا ہونے کے خدشے پر اس نے اسقاط حمل کروا دیا۔ چار سال بعد دوبارہ حمل ٹھہرا تو اس نے ایک بار پھر بیوی پر اسقاط حمل کے



لیے دباؤ ڈالا، لیکن اس بار بیوی نے انکار کر دیا، جس پر دونوں کے درمیان جھگڑے بڑھ گئے۔پولیس کے مطابق، ملزم نے منصوبہ بنا کر یکم اپریل کی رات بیوی اور دونوں بیٹیوں کو سوئمنگ پول لے جا کر پانی میں دھکیل دیا اور ڈبو کر قتل کر دیا۔ بعد میں اس نے گھر والوں کو یہ کہہ کر گمراہ کرنے کی کوشش کی کہ تینوں کی موت حادثاتی طور سوئمنگ پول میں گرنے سے  ہوئی ہے۔

تاہم، مقتولہ کے والد کو داماد پر شک ہوا اور انہوں نے پولیس میں شکایت درج کروائی۔ تفتیش کے دوران ملزم نے جرم کا اعتراف کر لیا۔ اس نے بتایا کہ بیوی کے بغیر بچوں کی پرورش مشکل سمجھتے ہوئے اس نے سب کو قتل کر دیا۔

پولیس نے نعشوں کا پوسٹ مارٹم کروا کر ورثا کے حوالے کر دیا ہے اور ملزم کو گرفتار کر کے عدالتی تحویل میں بھیج دیا گیا ہے۔