ممبئی میں عمارت گرنے سے ایک ہی خاندان کے 6 افراد جاں بحق

ذرائع:

ممبئی کے مانخورد کے جنتا نگر علاقے میں ایک غیر قانونی چار منزلہ عمارت گرنے سے دل دہلا دینے والا سانحہ پیش آیا۔ 39 سالہ معین الدین واجد علی شاہ کھانا اور گھریلو سامان خریدنے کے لیے گھر سے نکلے تھے، لیکن صرف دس منٹ بعد واپس آئے تو ان کی اہلیہ اختر جہاں (38)، بیٹیاں قیصر جہاں (14) اور انابیہ (3)، بیٹے جلال الدین (9) اور سراج الدین (6)، جبکہ بچوں کے ساتھ کھیلنے آئی پڑوس



کی عالیہ علاؤالدین شیخ (6) ملبے تلے دب کر جاں بحق ہو چکے تھے۔شدید بارش کے باعث عمارت میں دراڑیں اور جھکاؤ آنے کے بعد معین الدین نے اگلے روز گھر خالی کرنے کا فیصلہ کیا تھا، مگر اس سے پہلے ہی عمارت ان کے مکان پر آ گری۔ ممبئی میونسپل حکام نے گرنے والی عمارت کو غیر قانونی قرار دیا ہے۔ حادثے میں زخمی افراد کا علاج جاری ہے، جبکہ جاں بحق افراد کی میتیں تدفین کے لیے اترپردیش روانہ کر دی گئی ہیں۔