نظام آباد انکاؤنٹر میں راؤڈی شیٹر ریاض ہلاک

ذرائع:

نظام آباد میں رونما انکاؤنٹر میں بدنامِ زمانہ رؤڈی شیٹر رِیاض ہلاک ہوگیا۔اس واقعے پر تلنگانہ کے ڈائریکٹر جنرل آف پولیس شیودھر ریڈی نے میڈیا کو تفصیلات فراہم کیں۔ ڈی جی پی کے مطابق رِیاض کو علاج کے لیے اسپتال میں داخل کیا گیا تھا جہاں اُس نے موقع کا فائدہ اٹھا کر کمرے کے باہر تعینات اے آر کانسٹیبل کی بندوق چھیننے کی کوشش کی اور فرار ہونے کی کوشش کی۔ اسی دوران اُس نے پولیس پر فائرنگ کرنے کی بھی کوشش کی۔ ڈی جی پی شیودھر ریڈی نے کہا کہ پولیس ملازمین نے فوری طور پر



چوکسی کا مظاہرہ کرتے ہوئے اپنی جان بچانے کے لیے جوابی فائرنگ کی جس میں رِیاض موقع پر ہی ہلاک ہو گیا۔انہوں نے مزید کہا کہ اگر رِیاض‌کو فائرنگ کا موقع مل جاتا تو اسپتال میں موجود کئی جانیں خطرے میں پڑ جاتیں  اسی لیے پولیس نے عوام کی جانوں کو بچانے کے لیے فوری فیصلہ لیتے ہوئے کارروائی کی۔ڈی جی پی نے اُن خبروں کو بھی بے بنیاد قرار دیا جن میں کہا گیا تھا کہ پہلے رِیاض نے فائرنگ کی اور اے آر کانسٹیبل زخمی ہوا۔ اُن کا کہنا تھا کہ رِیاض نے فائرنگ کی  کوشش کی لیکن پولیس نے بروقت کارروائی کرتے ہوئے اُسے موقع نہیں دیا اور اُسے گولی مار دی۔