نظام آباد: بھیمگل پولیس اسٹیشن میں شخص نے خود کو آگ لگائی، حالت تشویشناک

ذرائع:

نظام آباد کے بھیمگل پولیس اسٹیشن میں سدھاکر نامی شخص نے مبینہ طور پر خود پر پٹرول چھڑک کر آگ لگا لی۔ واقعہ کے بعد اس کی حالت تشویشناک بتائی جارہی ہے، جسے فوری طور پر آرمور کے اسپتال منتقل کردیا گیا۔خاندانی ذرائع کے مطابق پولیس کی مبینہ ہراسانی سے دلبرداشتہ ہوکر سدھاکر نے یہ انتہائی قدم اٹھایا۔ سدھاکر بھیمگل ٹاؤن میں ہوٹل چلاتا ہے۔ بتایا گیا ہے کہ پولیس نے اسے



رات 10 بجے کے بعد ہوٹل کے باہر رکھی میزیں ہٹانے کی ہدایت دی تھی۔سدھاکر نے مبینہ طور پر حلف لیتے ہوئے یقین دہانی کرائی تھی کہ وہ آئندہ ایسا نہیں کرے گا۔ تاہم، بھیمگل کے ایس آئی تروپتی نے اس کے خلاف مقدمہ درج کرلیا۔پولیس نے سدھاکر کو یہ کہتے ہوئے پولیس اسٹیشن طلب کیا کہ اسے آج عدالت میں پیش ہونا ہے۔ پولیس اسٹیشن پہنچنے کے بعد وہ مبینہ طور پر دلبرداشتہ ہوگیا اور خود پر پٹرول چھڑک کر آگ لگا لی۔