بریانی اور تربوز کھانے کے بعد ایک ہی خاندان کے چار افراد کی پراسرار موت، معاملہ پیچیدہ

ذرائع:

ممبئی  میں بریانی اور تربوز کھانے کے بعد ایک ہی خاندان کے چار افراد کی پراسرار موت کے معاملے نے نیا موڑ اختیار کر لیا ہے۔ فارنسک کی ابتدائی رپورٹ میں ایسے انکشافات سامنے آئے ہیں جنہوں نے اس کیس کو مزید پیچیدہ بنا دیا ہے۔تفصیلات کے مطابق 25 اپریل کو جے جے مارگ علاقے میں رہنے والے عبداللہ ڈوکادیا، ان کی اہلیہ نسرین اور دو بیٹیوں نے پارٹی کے بعد بریانی اور تربوز کھایا، جس کے بعد انہیں شدید قے اور دست کی شکایت ہوئی۔ اسپتال منتقل کیے جانے کے باوجود چاروں جانبر



نہ ہو سکے۔پوسٹ مارٹم رپورٹ کے مطابق جسمانی اعضا کا غیر معمولی طور پر سبز رنگ میں تبدیل ہونا اور عبداللہ کے جسم میں مارفین کی موجودگی نے زہر خورانی کے شبہات کو تقویت دی ہے۔ اس کے بعد پولیس نے مختلف زاویوں سے تحقیقات شروع کر دی ہیں۔حکام کے مطابق اس کیس میں خودکشی، ذاتی دشمنی اور ممکنہ زہریلی شے سمیت تمام پہلوؤں پر تحقیقات جاری ہیں۔ ساتھ ہی یہ بھی سامنے آیا ہے کہ عبداللہ 2019 کے ایک فراڈ کیس میں اہم گواہ تھے، جس کی آئندہ سماعت متوقع تھی، اور پولیس اس پہلو کو بھی تحقیقات میں شامل کر رہی ہے۔