نوئیڈا ایکسپریس وے پر چلتی سلیپر بس میں زبردست آگ، 30 مسافر محفوظ

ذرائع:

نوئیڈا کے سیکٹر 148 کے قریب نوئیڈا-گریٹر نوئیڈا ایکسپریس وے پر منگل کی شام ایک چلتی ہوئی سلیپر بس میں اچانک زبردست آگ بھڑک اٹھی۔ بس میں تقریباً 30 مسافر سوار تھے۔ آگ لگتے ہی بس میں افراتفری مچ گئی، تاہم تمام مسافروں کو بحفاظت باہر نکال لیا گیا۔ آگ نے دیکھتے ہی دیکھتے شدت اختیار کرلی اور دور تک دھوئیں کے بادل اور بلند شعلے دکھائی دینے لگے۔ اطلاع ملتے ہی نالج پارک پولیس اسٹیشن کی ٹیم اور فائر بریگیڈ موقع پر



پہنچ گئی، جہاں فائر فائٹرز نے آگ پر قابو پانے کی کارروائی شروع کی۔ آگ لگنے کی وجوہات ابھی معلوم نہیں ہوسکی ہیں۔ قابل ذکر ہے کہ حال ہی میں اسی طرح کے بس حادثے میں 9 افراد کی موت ہوئی تھی۔ اس کے باوجود ایک بار پھر سلیپر بس میں آگ لگنے کے واقعہ نے بسوں کی سیفٹی اور ضلعی انتظامیہ کی کارکردگی پر سوالات کھڑے کردیئے ہیں۔ عوام میں یہ سوال بھی اٹھ رہا ہے کہ 9 افراد کی ہلاکت کے باوجود انتظامیہ نے بسوں کی حفاظت کے حوالے سے مؤثر اقدامات کیوں نہیں کیے۔