منچریال میں آٹو اور لاری کی ٹکر، 4 خواتین مزدور ہلاک، 3 زخمی

منچریال ضلع کے نَسپُور میں آٹو رکشا اور لاری کے درمیان خوفناک سڑک حادثہ پیش آیا، جس میں چار خواتین مزدور ہلاک جبکہ تین دیگر شدید زخمی ہوگئیں۔ حادثے میں دو خواتین کی موقع پر ہی موت ہوگئی، جبکہ دیگر دو نے منچریال سرکاری اسپتال میں دورانِ علاج دم توڑ دیا۔ مہلوکین کی شناخت لکشمی، اگّا ساؤندریہ، سونیا اور سمالتا کے طور پر کی گئی ہے۔ اطلاعات کے



مطابق یہ خواتین روزانہ اجرت پر کام کے لیے منچریال جارہی تھیں کہ راستے میں ان کا آٹو رکشا لاری سے ٹکرا گیا۔ پولیس کو آٹو ڈرائیور کی مبینہ لاپرواہی کا شبہ ہے اور حادثے کی مزید تحقیقات جاری ہیں۔ ریاستی وزیر ویویک وینکٹ سوامی  نے اسپتال پہنچ کر زخمیوں کی عیادت کی اور مہلوکین کے خاندانوں کو اپنی جانب سے 25 ہزار روپے جبکہ زخمیوں کو 10،10 ہزار روپے  کی مالی مدد فراہم کی۔