جیل میں بند گینگسٹر سیاستدان مختار انصاری انتقال کر گئے

باندہ : باندہ جیل میں نظر بند مختار انصاری جمعرات کی رات دل کا دورہ پڑنے سے انتقال کر گئے۔ رانی درگاوتی میڈیکل کالج کے ذرائع نے بتایا کہ انصاری کو آج رات تقریباً 8.30 بجے نازک حالت میں اسپتال لایا گیا تھا جب وہ اپنی بیرک میں بے ہوش پڑے پائے گئے۔ علاج کے دوران ان کی طبیعت بگڑ گئی اور دل کا دورہ پڑنے سے انتقال ہوگیا۔ مختار انصاری کی عمر 63 سال تھی۔

آٹھ ڈاکٹروں کی ٹیم نے ان کا علاج شروع کیا لیکن ان کی پوری کوشش کے باوجود مختار انصاری کا دل کا دورہ پڑنے سے انتقال ہوگیا۔

جیل ذرائع کے مطابق جمعرات کی شام مختار کی طبیعت بگڑ گئی۔ فوری طور پر ضلعی انتظامیہ کو



اطلاع دی گئی۔ اطلاع ملتے ہی ضلع مجسٹریٹ درگا شکتی ناگپال اور پولیس سپرنٹنڈنٹ انکور اگروال سمیت پوری انتظامیہ ایک ٹیم کے ساتھ جیل پہنچ گئی اور مناسب سیکورٹی کے ساتھ انہیں فوری طور پر میڈیکل کالج میں داخل کرایا گیا۔ میڈیکل کالج میں ضلع مجسٹریٹ اور سپرنٹنڈنٹ آف پولیس سمیت تمام انتظامی افسران موجود تھے۔ اس کے علاوہ ضلع کی بھاری پولیس فورس میڈیکل کالج کیمپس پہنچ گئی۔

بروز منگل کو بھی مختار کو پیٹ سے متعلق مسائل کی وجہ سے ڈسٹرکٹ اسپتال میں داخل کرایا گیا تھا، جہاں آرام ملنے کے بعد انہیں جیل منتقل کر دیا گیا تھا۔

مختار انصاری کی موت کے بعد احتیاطی اقدام کے طور پر باندہ، غازی پور اور مؤ میں سیکورٹی میں اضافہ کردیا گیا ہے۔