حیدرآباد: ڈیوٹی پر جانے والی سینئر خاتون نرس ٹکر میں جاں بحق، ملزمان فرار

حیدرآباد کے آصف نگر علاقے میں اتوار کی صبح پیش آئے ہٹ اینڈ رن حادثے میں 35 سالہ سینئر نرس فہیم النساء جاں بحق ہوگئیں۔ ہل کالونی کی رہائشی فہیم النساء ڈیوٹی پر جانے کے لیے گھر سے نکلیں تو ایک تیز رفتار ٹویوٹا اِنووا نے انہیں ٹکر مار دی۔مقامی افراد نے انہیں فوری طور پر عثمانیہ ہاسپٹل منتقل کیا،



جہاں ڈاکٹروں نے مردہ قرار دے دیا۔ حادثے کے بعد کار میں سوار افراد گاڑی چھوڑ کر فرار ہوگئے۔ پولیس نے گاڑی ضبط کرلی ہے۔ابتدائی تحقیقات میں معلوم ہوا ہے کہ اِنووا سیلف ڈرائیو پر کرایہ پر لی گئی تھی۔ پولیس نے گاڑی کرایہ پر لینے والوں کی شناخت کرلی ہے اور وہ حادثے کے بعد فرار ہوگئے۔ پولیس ملزمین کی تلاش میں مصروف ہے۔