حیدرآباد کے ملاپور کے ریکور اسپتال میں پیر 22 جون کو پیش آئے ایک افسوسناک واقعے میں ایک ڈاکٹر نے مبینہ طور پر خودکشی کر لی۔ متوفی کی شناخت ڈاکٹر کاشف احمد کے طور پر ہوئی ہے، جو اسپتال میں ڈیوٹی ڈاکٹر کے طور پر خدمات انجام دے رہے تھے اور اصل میں آندھرا پردیش کے وشاکھاپٹنم (ویزگ) کے رہنے والے تھے۔ میڈیا سے بات کرتے ہوئے بالاپور سرکل انسپکٹرایم سدھاکر نے بتایا کہ ابتدائی تحقیقات کے مطابق ڈاکٹر کاشف احمد نے خود کو زہر کا انجکشن
لگایا تھا۔ انہوں نے کہا کہ ڈاکٹر کاشف کی موت غالباً پیر کی رات دیر گئے ہوئی۔ تاہم خودکشی کی وجوہات ابھی تک معلوم نہیں ہو سکی ہیں۔ انسپکٹر سدھاکر کے مطابق متوفی کے والدین کو واقعے کی اطلاع دے دی گئی ہے اور وہ حیدرآباد روانہ ہو چکے ہیں۔ پولیس نے بتایا کہ اس واقعے کا انکشاف اس وقت ہوا جب اسپتال کے عملے نے اسٹاف روم کا دروازہ کھٹکھٹایا، لیکن اندر سے کوئی جواب نہ ملنے پر دروازہ توڑ کر کھولا گیا۔ اندر داخل ہونے پر ڈاکٹر کاشف مردہ حالت میں پائے گئے۔