ملاپور میں بیوی اور اس کے عاشق کے ہاتھوں شوہر کا قتل، دو گرفتار

حیدرآباد 4 جنوری 2026 (اعتماد نیوز) شہر کے علاقہ ملا پور میں ایک شخص کی مشتبہ حالت میں موت ہوگئی تحقیقات کے دوران اس بات کا انکشاف ہوا کہ بیوی نے اپنے عاشق کے ساتھ مل کر اس کا قتل کردیا ہے۔ذرائع کے مطابق ریاست اڈیشہ سے تعلق رکھنے والا 35 سالہ نارائن بہرا پیشہ سے پلمبر بتایا گیا ہے۔ وہ گزشتہ ایک سال سے ملا پور میرپیٹ شانتی نگر میں اپنی بیوی 27 سالہ بندھیتا بہرا اور 6 سالہ بیٹی کے ساتھ مقیم تھا۔ اس دوران خاتون کے ناجائز تعلقات 25 سالہ ودیا ساگر متوطن بہار سے قائم ہوگئے۔نارائن اکثر شراب



نوشی کرتا تھا۔نئے سال کے موقع پر وہ شراب پی کر رات تقریباً 8 بجے گھر آیا جس کے بعد شوہر بیوی کے درمیان جھگڑا ہوا اور برہم بیوی نے اپنے عاشق کے ساتھ مل کر شوہر کے سر پر کسی آہنی سلاخ سے وار کیا جس پر وہ بے ہوش ہو گیا اور کچھ دیر بعد اس کی موت ہوگئی۔پلمبر نارائن کی موت کی اطلاع ملتے ہی جمعہ کی صبح پڑوسی اس کے گھر پہنچ گئے اور پولیس کنٹرول روم کو اطلاع دی گئی۔ ناچارم پولیس نے جب تفتیش کی تو مقتول کی بیوی نے اقبال جرم کرلیا۔ پولیس نے اس معاملہ میں کیس درج کرکے بیوی اور اس کے عاشق کو حراست میں لے لیا ہے۔